Proceso participativo para o deseño do Leader 14-20

O Programa de axudas europeo Leader que xestionamos dende o Ulla Tambre Mandeo chega a súa fin. Estanse comprobando e poñendo en marcha os últimos investimentos, e a final de ano pagaranse as últimas subvencións con cargo a este programa.
Pero isto non remata aquí. Un novo Grupo de Desenvolvemento Rural, cunha nova distribución territorial e un novo orzamento, serán os encargados de seguir traballando dende o ano que ven ata o 2020.
As principais características do Leader consisten no seu carácter local e participativo, onde somos nós, os axentes do territorio, os que definimos a estratexia a seguir para lograr un desenvolvemento rural axeitado.
No novo período hai menos orzamento para o Leader, e por iso os territorios téñense que reestruturar, pasando, en Galicia, de 31 GDRs a 21.
A nova distribución territorial dependerá do que os concellos e as asociacións de cada concello, estimen convinte. A Xunta de Galicia fixo tres propostas e enviou tres mapas posibles. Agora ten que ser a poboación a que determine se esas propostas son as que máis se adaptan á realidade socio-económica do territorio. E por iso a Xunta de Galicia habilitou un prazo de ALEGACIÓNS, ata o 13 de outubro, aberto a todo o mundo, particulares, asociacións, empresas...
Se tes interese en coñecer estas propostas, e opinar, tanto sobre o mapa como sobre o réxime que rexirá as axudas para o próximo período, ponte en contacto co GDR e che faremos chegar toda a información.
Porque NO RURAL DECIDES TI!! PARTICIPA!!

Mapa turístico Ulla Tambre Mandeo

Descarga o noso mapa turístico, no que che propoñemos unha ruta de 3 ou 6 días (dependendo da túa dispoñibilidade) para que non perdas ningún dos nosos imprescindibles. Sexas unha persoa que viaxa soa, en familia ou con amistades... este é o teu destino! Gózao!!!

Mapa Turístico Ulla Tambre Mandeo

Rematamos o noso percorrido turístico en Melide, Toques e Santiso

Comezamos esta última xornada turística polo territorio do GDR Ulla Tambre Mandeo coñecendo os concellos de Santiso, Toques e Melide.

 

Un bo comezo é, sen dúbida, subir a bordo do único ferri de augas interiores de Galicia, o que comunica o concello de Santiso con Vila de Cruces nos Embalse de Portodemouros en pleno río Ulla de maneira gratuíta e que leva funcionando dende o ano 1977.

 

A continuación, podemos visitar o fermoso pazo de Vilar de Ferreiros en Visantoña e coñecer nesta mesma parroquia e tamén na próxima de Novela dous dos cruceiros máis curiosos de Galicia; con elementos característicos como o pousadoiro dun deles ou as caveiras esculpidas das súas bases. E, antes de marchar, convén tomar un refrixerio e desfrutar da estupenda área recreativa do Liño, na Cornella; para coller forzas.

Despois do concello de Santiso, podemos desprazarnos ata Toques, posuidor dun inxente patrimonio natural como o reflicte o feito de que o 40% da superficie municipal deste concello pertenza á rede Natura coa Serra do Careón.

Toques pode ensinarnos moito de natureza, por exemplo, visitando a impresionante Fervenza das Brañas no río Furelos; pero tamén moito do noso pasado co seu numeroso e importante patrimonio arqueolóxico e histórico, do cal se poden citar como imprescindibles o dolmen Forno dos Mouros ou o mosteiro de San Antolín; testemuña do patrimonio relixioso prerrománico.

 

E, como non, rematamos en Melide, o cal non ten nada que envexar a nivel patrimonial ós seus veciños. De visita ineludible é a Praza do Convento, en pleno núcleo urbano, admirando a Obra Pía de Santo Antón e o Museo Etnográfico da Terra de Melide, o cal recolle importantes mostras do patrimonio histórico da comarca.

 Sen movernos do núcleo da vila,  non deberíamos marchar sen visitar o “cruceiro máis antigo de Galicia”, segundo dicía Castelao, polo cruceiro de San Roque enfronte da capela do mesmo nome.

Melide ofrece, para rematar a intensa xornada, un fermoso espazo para gozar da natureza e descansar como é a Praia Fluvial de Furelos e aldeas próximas con encanto como son a propia de Furelos e a de Leboreiro; perfectamente conservadas e con mostras de arquitectura civil impresionantes como pode ser a Ponte de Furelos.

 

Rematamos aquí co noso percorrido polas comarcas de Melide e Arzúa e polos concellos de Curtis e Vilasantar, para quen teña gana de máis, lembrade que contades co mapa turístico do GDR recén saído da imprenta no que poderedes atopar, ademáis dos recursos patrimoniais dos dez municipios, unha estupenda guía de negocios de aloxamento, restauración e actividades do mesmos.

Gozade da visita!!!

 

Seguimos coa visita: Arzúa, Boimorto, Touro e O Pino

Continuamos coñecendo os atractivos do territorio do Ulla Tambre Mandeo e, desta volta, dámoslle o protagonismo ós concellos que compoñen a comarca de Arzúa.

Iniciamos o día no núcleo urbano da cabeceira comarcal visitando a Capela da Madanela, igrexa dun antigo mosteiro de agustinos do que non se conserva nada; na mesma dirección,  continuamos camiño cara o embalse de Portodemouros onde coñeceremos de preto o mundo das abellas e da produción apícola no Museo Vivente do Mel coas súas visitas guiadas ou os seus talleres (cera, mel, etc.). Á volta, cunha pequena parada na aldea de Hortas, descubrimos un fermoso lugar en plena natureza como é a Fervenza das Hortas, tamén chamada Fervenza de Santa Marta.

De camiño cara Boimorto, o segundo concello en recibirnos na rolda de hoxe, son dúas as visitas que merecen a pena, por unha banda o fermoso Pazo de Santa María e, pola outra, o Museo Etnográfico da Paínza; onde podemos familiarizarnos cun pasado non tan afastado da Galicia rural e dos oficios que nela se desenvolvían.

 

Xa en Boimorto, a primeira parada obrigada é a igrexa románica de Sendelle do século XII, co seu ábside semicircular, onde se poden ver pinturas murais so século XVI con distintas escenas da liturxia relixiosa. Ademais, podemos coñecer máis a fondo este concello bañado polo río Tambre recorrendo algunha das rutas coas que contan, sendo unha delas a que transcorre pola antiga vía romana, na que se achou o miliario romano que se atopa diante do edificio do Concello.

 

Unha boa data para coñecer o concello de Boimorto é, sen dúbida, o segundo fin de semana de setembro, coincidindo co Festival da Luz que se celebra en Andabao, onde se dan cita músicos nacionais e internacionais con fins solidarios e se exalta a vida rural e a natureza.

 

 

Neste momento do itinerario, restan por visitar os concellos da comarca de Arzúa máis achegados a Santiago. En Touro, unha das primeiras opcións para os amantes da natureza é percorrer as dúas estupendas rutas homologadas coas que contan. A “dos tres ríos” e a da “ribeira do Ulla”, onde nos podemos coñecer a vexetación de ribeira, os estupendos bosques de sobreiras, as ouriceiras que atopamos ó pe da ruta para almacenar e recoller castañas e os lugares máis escondidos e máxicos de ambos itinerarios como poden ser o Salto das Pombas, a Fervenza do Inferniño ou xa, no final da ruta de ribeira, o Pozo do Pego; o cal é ideal para unha merenda relaxada  lonxe do estres cotián.

 

Tamén en Touro, dentro de pouco, poderemos completar a xornada cunha visita ó Centro de Interpretación do Río Ulla, que se poñerá en marcha proximamente e contará cunha axuda do Programa Leader do GDR.

E rematamos no concello de O Pino, onde se nos quedan forzas, son tamén recomendables as rutas coas que conta o Concello, as cales se puxeron en marcha cunha axuda Leader no ano 2011, xa que nelas atopamos unha magnífica mostra do principal patrimonio municipal. Trátase dun itinerario cultural, unha senda fluvial e outra panorámica onde podemos coñecer, entre outros elementos patrimoniais, a ponte romana de Ponte Puñide e a igrexa de San Xulián de Lardeiros ou “catedral da montaña”; ver unha excepcional paisaxe desde o mirador do Picón (punto xeodésico) ou pasar unha fermosa xornada na área recreativa da Capela da Magdalena, á que acompañan a fonte, a carballeira e a lagoa para formar un idílico conxunto etnográfico e natural.

 

Moi recomendable o día 22 de xullo, día da patrona, cando se celebra unha multitudinaria romaría campestre no lugar.

Comezamos a nosa visita.. Curtis, Sobrado e Vilasantar

Comezamos o noso itinerario particular coñecendo un pouco máis de preto os concellos de Curtis, Sobrado e Vilasantar.

 

Os tres formaron en tempos o chamado condado de Présaras pero a súa íntima relación comeza coa instauración na Ciadella, entre Sobrado e Vilasantar, do campamento romano do mesmo nome, onde se aloxou a Cohors I Celtiberorum; Cohorte Romana no século II. Coa súa chegada, comeza a estruturarse definitivamente este territorio.

 

Este sería, desde logo, un dos primeiros puntos a visitar se nos achegamos a Sobrado dos Monxes, posto que é o campamento romano de maior extensión achado na Península, con aproximadamente dúas hectáreas e unha estrutura típica dun campamento para unha cohorte "equitata", isto é, con cabalería. Distínguense á perfección, grazas ás excavacións dos 80 e 90, o principia (edificio administrativo e relixioso) o praetorium (vivenda do alto mando) e as hórrea (almacéns de gran).

 

Para completar o día de turismo, achegarémonos ó núcleo urbano de Sobrado, para coñecer o incrible Mosteiro de Santa María de Sobrado, visita obrigada tanto pola súa fermosura como polo seu valor arquitectónico. Foi fundado precisamente polo Conde de Présaras Hermenegildo no ano 952 que alí se retirou e morreu, cedendo o condado ó mosteiro e, actualmente, da man dos monxes cistercienses funciona a hospedería na que podemos quedarnos a durmir.

Outro dos enclaves imprescindibles, tamén relacionado co mosteiro, é a lagoa de Sobrado, a escasos mil metros, de orixe artificial creada polos propios monxes para servizo de rega e piscifactoría. Sorpréndenos cun espectáculo incrible no solpor pola fauna existente.

 

Continuamos a nosa visita achegándonos, a continuación, ó concello de Vilasantar; onde comezaremos por coñecer dous dos lugares máis destacados da parroquia de Mezonzo.

 

O primeiro deles é a Igrexa de Santa María de Mezonzo, xoia románica que se localiza no lugar do Priorato, o cal xa nos da unha pista da existencia dun mosteiro no pasado. Nel profesou e chegou a abade San Pedro de Mezonzo, antes de marchar cara o mosteiro de Sobrado primeiro e de converterse en Bispo de Santiago posteriormente. A él lle debemos a Salve e a defensa de Santiago durante o ataque de Almanzor.

 

A escasa distancia da igrexa de Santa María, atopámonos cun elemento etnográfico completamente recuperado, o Batán de Mezonzo, na aldea do mesmo nome. O encargado de ensinarnos o seu funcionamento e de poñelo a andar (se a corrente do día da visita o permite) é o seu dono, Pepe, o cal co seu relato e anécdotas nos transporta a un pasado non tan lonxano no que as familias da contorna utilizaban os muíños, os batáns e os mazadoiros de liño para a súa vida cotiá.

 

Rematamos a nosa visita no concello de Curtis, que ó igual que os dous anteriores, conta cun gran patrimonio arqueolóxico composto de mámoas e castros, o que nos fala da longa historia deste territorio.

 

Do mesmo xeito, conta con fermoas igrexas de orixe románica e prerrománica, posteriormente rehabilitadas como poden ser a Igrexa dos Remedios, acompañada do seu carballo centenario, a igrexa de Santaia, parroquia de nacemento de San Pedro de Mezonzo ou a igrexa de San Roque de Xabriño, na parroquia de Fisteus; cun fermoso conxunto etnográfico composto por igrexa, fonte e carballeira.

 



 

Ademais, ó paso por Curtis, recomendamos visitar o Centro Etnográfico do Mandeo, no núcleo urbano de Teixeiro, o cal nos axudará a comprender moito mellor a historia e patrimonio da zona, ó tempo que disfrutamos a súa orixinal arquitectura e do paseo de ribeira do seu exterior. Por outra banda, para rematar, podemos dar un relaxante paseo polo río Mandeo ó seu paso polo concello pasando pola Ponte Marzá, recentemente rehabilitada.