Na tarde do pasado venres, na Escola de Agricultura Ecolóxica de Vilasantar, tivo lugar a presentación do último libro dos Bolechas; Os Bolechas van ás Terras do Ulla Tambre e Mandeo.
Como o seu título indica, nesta nova aventura Carlos, Loli, Pili, Braulio, Sonia, Tatá e Chispa visitan os dez concellos do territorio do GDR (comarca de Arzúa, comarca de Melide, Curtis e Vilasantar) coñecendo de preto a produción e gastronomía local así como o principal patrimonio natural e cultural do mesmo. Do mesmo xeito, neste novo libro, os seis irmáns familiarizanse coa labor e obxectivos da Asociacións, ente xestor do Programa Leader para o desenvolvemento do rural.
No acto estiveron presentes varios membros da Xunta Directiva do GDR así como o autor dos Bolechas, Pepe Carreiro, que fixo as delicias dos preto de setenta nenos e nenas que acudiron á presentación ensinándolles como debuxar ós coñecidos personaxes de ficción infantil e dedicándolle a cada asistente un exemplar do libro, repartidos entre os asistentes.
Por outra banda, os nenos e nenas aproveitaron a ocasión para visitar as instalacións da Escola de Agricultura Ecolóxica de Vilsantar, visitando ós animais da granxa e aprendendo sobre os cultivos postos en marcha da man do persoal encargado.
